शिक्षकको कोटामा कर्मचारी, पत्रकार र शिक्षक नेता कोरिया जाँदै (नामावली सहित)

लेखक:- Ramesh Thapa, September 28, 2015

काठमाडौँ । कोरियन सरकारले उपलव्ध गराएको माध्यमिक शिक्षक कम्पुटर प्रशिक्षक तालिम लिन मन्त्रालयका कर्मचारी तिनका नातेदार र शिक्षक नेता सहितको जम्बो टोली कोरिया जाने भएको छ ।

कोरियन सरकारले नेपालको माध्यमिक विद्यालय तहमा कार्यरत शिक्षकलाई प्रशिक्षक तालिम दिएर आइसिटी शिक्षा (ICT education )लाई विद्यालयमा प्रभावकारी बनाउने उद्देश्यले यस वर्ष २२ कोटा उपलब्ध गराएको छ ।

कोरियाको उल्सान नगरमा आउदो नोभेम्बर २२ देखि डिसेम्बर ४ तारेखसम्म संचालन हुने उक्त तालिममा नेपालको तर्फबाट भने शिक्षकको सहभागिता नभई शिक्षा मन्त्रालयका कर्मचारी र तिनका नातेदार प्रा.वि.र नि.मा.वि. तहका शिक्षक, शिक्षक नेता तथा पत्रकार जाने भएका छन । कोरियन सरकारले विद्यालयस्तरमा प्रविधियुक्त शिक्षाको विस्तार गर्न भन्दै मावि शिक्षकहरुलाई वर्षेपिच्छे कम्पुटर प्रशिक्षक तालिम दिने गर्दै आएको छ ।

गत वर्ष उक्तकोटामा केहि मावि स्तरका शिक्षक नेता तथा अभिभावकहरुको टोली गएको थियो । त्यसको चौतर्फी आलोचना भएको थियो । त्यसपछि शिक्षकका संघसंगठनहरु र शिक्षामन्त्रालयले समेत पहिलो पटक भएकाले शिक्षक नेताहरु गएका र अव देखि वास्तविक मावि शिक्षकलाई मात्रै पठाइने बताएका थिए ।

अन्ततः शिक्षामन्त्रालयले शिक्षक महासंघसँग समन्वय नै नगरी आफुखुसी मन्त्रालयका कर्मचारी, जिल्ला शिक्षा अधिकारी, शिक्षामन्त्रीका नातेदार, कांग्रेस निकट शिक्षक नेताहरु र केही पत्रकारहरुलाई कोरिया पठाउन लागेको मन्त्रालय स्रोतले जनाएको छ ।

विगतमा शिक्षकका ठाउँमा शिक्षक नेताहरु गएकामा आलोचना भएपछि कोरियन सरकारले समेत आइन्दा कम्पूटर सम्बन्धि ज्ञान भएको विषयगत शिक्षकलाई मात्र पठाउन शिक्षामन्त्रालयको ध्यानाकर्षण गराएको थियो । तर शिक्षा मन्त्रालयले त्यसलाई वेवास्ता गर्दै उल्टै शिक्षकको कोटामा जि.शि.अ., उप­सचिव तथा आफु नजिकका प्रावि र निमावि शिक्षक लगायतलाई लाई पठाउन लागेको हो ।

मन्त्रालय स्रोतका अनुसार अहिले नाम सार्वजनिक नगरेपनि समाचार संकलन गर्न भन्दै केहि शिक्षापत्रकारहरुलाई समेत कोरिया लग्ने तयारी भएको हो । पोहोर साल शिक्षक नेता जादाँ तिव्र आलोचना गरेका कर्मचारी, शिक्षक र पत्रकारहरुलाई कोरिया जाने टोलीमा समावेश गरिएको हो ।

महासंघको आपत्ति
नेपाल शिक्षक महासंघले मावि शिक्षक कोटामा कर्मचारी र नातेदार शिक्षकलाई कोरिया पठाउन लागेको प्रति आपत्ति प्रकट गरेको छ ।महासंघले यसै विषयमा आज मन्त्रालयमा जानकारी लिन जाने तयारी समेत गरेको महासंघका महासचिव तिलक कुँवरले जानकारी दिए ।

शिक्षक महासंघ आन्दोलनमा भएको वेला शिक्षा मन्त्रालयले मनपरि गरी शिक्षकको कोटामा कर्मचारी पठाउने निर्णय गर्दा अहिले सरकासँग चलिरहेको वार्ताको वातावरण समेत विग्रन सक्ने कुँवरले चेतावनी दिए ।

शिक्षकलाई दिनु पर्ने तालिम कर्मचारीले लिने अनि शिक्षाको गुणस्तर खस्क्यो भनेर शिक्षकलाई सराप्न पाइन्छ ? प्रश्न गर्दै गत वर्ष शिक्षकका नेताहरु तालीममा जादा आकाशै खसे झै गरि प्रचार गर्ने मिडियाका साथीहरु पनि यस बर्ष सुतेका उनले आरोप लगाए । कतै गोप्यमा उनीहरुको पनि नाम परेको छ की भन्ने शंका गरिदै छ । उनले भने ।

महासंघले कक्षा कोठामा विद्यार्थीलाई पढाउने विषयको तालीममा शिक्षकलाई नपठाई कर्मचारी वा अरुलाई पठाउनु नाजायज काम भएकोले यस्तो गलत पर्वृतिको भण्डाफोर गर्न सबैमा अपिल समेत गरेको कुँवरले जानकारी दिए ।

कोरिया जाने टिमको नामावली
१. अशोक कुमार यादव                    निमावि शिक्षक
२. श्रीकान्त पण्डीत                            प्रावि शिक्षक
३. अशोक यादव                                  शिक्षक
४. मेघनाथ यादव                               शिक्षक
५. दिलनाथ पुरी                                  जिशिअ
६. प्रल्हाद अर्याल                                 जिशिअ
७. हरी अर्याल                                       जिशिअ
८. रुद्र प्रसाद दूलाल                              जिशिअ
९. मुकुन्द केशरी पोखरेल                    उप सचिव
१०. बाबुराम ढुंगाना                              उप सचिव
११. अञ्जु पाण्डे                                      शाखा अधिकृत
१२. राजेन्द्रराज पौडेल                           महासचिव ­ -नेपाल शिक्षक संघ
१३. किशोरदत्त बराल                             उपाध्यक्ष ­ -नेपाल शिक्षक संघ
१४. अम्विका साह                                  वरीष्ठ प्रशिक्षक
१५. बुद्धी प्रसाद काफ्ले                           मावि शिक्षक
१६. अम्विका प्रसाद अर्याल                   जिशिअ

बांकी नाम मन्त्रालयले गोप्य राखेकाले प्रकाशित गर्दै जानेछौँ ।